ئیبراهیم خەیات – لە ژێر ئاسمانی شینا
هۆنراوەی: گۆران
لە ژێر ئاسمانی شینا
لە پاڵ لووتەکەی بەفرینا
کوردستان گەڕام
دۆڵاو دۆل پێوام
نە لەشار و نە لەدێ ، نەمدی کەس
وەک تۆ جوان بێ! تۆیت و بەس
کچە کوردێك دڵ پێی شاد بێ
وەک فریشتە و پەریزاد بێ!
نە باریکی، نە گۆشتن
نە کچۆڵەی نە شاژن
نە زۆر چاوڕەش نە ئێجگار گەش
بەڵام نیگای شیرین نەمدی کەس
وەك تۆ بەتین ، تۆیت و بەس!
لێت بێ بزەی مانگە شەوی!
بەژن ڕێك و ڕەوتی کەوی
لەو ڕۆژەوە تۆم دیوە
عەشقێک لە دڵ چەسپیوە!
ساتێ دوور بی لێم،
گڕ بەر ئەبێ تێم!
کە دەست لە یەخەت گیر نابێ!
لە لای کەس،دڵ ژیر نابێ
تۆیت و بەس
پەنای هیوا و خوبینینم
ئاواتی گیانی شیرینم
ئەوسا کە تۆم نەدیبوو
ژینم تاڵی و ترشی بوو !
بەبێ شادی و ئارام
بەبێ هیوا و ناکام
ئەژیام ژینی سەرسەری
نەمبوو کەس
تۆ ڕابەری ، تۆیت و بەس
