عەدنان کەریم – دوو ئاوانەکەی
شیعری: پێرەمێرد
دوو ئاوانەکەی شوێن ماڵە گەورە
سەرەو خوار ئەڕۆی بە پێچ و دەورە
لە ڕاگو سەرتا بە دڵەی پڕ خەم
ڕۆژی رووناکم لێ بووە بە تەم
تۆ بە روناکی وێنەی بلوری
ئاوی زیندەگی گشت شارەزووری
ئەناڵم ئەڵێم: تۆ وەك ئاوێنەی
بۆ شوێن دەستکردی کردگار وێنەی
بۆچ پێم نانوێنی وێنەی فۆتۆغراف
وێنەی شیرینی نازدارانی جاف
نموونەی دەستی پەروەردگار بوون
بەدەوری تۆدا گوڵی بەهار بوون
بەشەدەی لارو کراسی کەتان
وەك مانگ (کەتان)ی جەرگیان ئەسووتان
وەك مانگ بە شەوی تاریکی دەیجوور
بورجی رەشماڵیان پڕ ئەکرد لە نوور
شەوێ مانگە شەو ئاوایی خەوتن
لەدوای سرەوتن کاتی تێکەوتن
ئەو لەش و لارە بە شڵپەی مەلە
دڵی دڵداریان ئەخستە پەلە
ئاوازی باز و سەقر و باڵەبان
حیلەی ماینی جنسی کەحیلان
ئای بۆ (پەری خان) نازداری جافان
ئاهووی زەڕباهووی عەنبەر کڵافان
ماڵە بەگزادەو سیڕەی سەماوەر
رووی ئەو روبارەی وا ئەگرتە بەر
توخوا ئاوەکەی بۆن گوڵاوەکە
بۆ سەرچاوەکە کەمێ لاوەکە
بڕوانم ئاخۆ جامی فۆتۆگراف
نیشانم نادات شێوەی ئێلی جاف
التعليقات مغلقة.