رەفیق چالاك – دوو ئاوانەکەی
شیعری: پێرەمێرد
دوو ئاوانەکەی شوێن ماڵە گەورە
سەرەو خوار ئەڕۆی بە پێچ و دەورە
تۆ بە روناکی وێنەی بلوری
ئاوی زیندەگی گشت شارەزووری
لە ڕاگو سەرتا بە دڵەی پڕ خەم
ڕۆژی رووناکم لێ بووە بە تەم
ئەناڵم ئەڵێم: تۆ وەك ئاوێنەی
بۆ شوێن دەستکردی کردگار وێنەی
بۆچ پێم نانوێنی وێنەی فۆتۆغراف
وێنەی شیرینی نازدارانی جاف
نموونەی دەستی پەروەردگار بوون
بەدەوری تۆدا گوڵی بەهار بوون
بەشەدەی لارو سەرپۆشی کەتان
وەك مانگ (کەتان)ی جەرگیان ئەسووتان
وەك مانگ بە شەوی تاریکی دەیجوور
بورجی رەشماڵیان پڕ ئەکرد لە نوور
شەوێ مانگە شەو ئاوایی خەوتن
لەدوای سرەوتن کاتێ تێکەوتن
ئەو لەش و لارە بە شڵپەی مەلە
دڵی بێ دڵیان ئەخستە پەلە
ئای بۆ (پەری خان) نازداری جافان
ئاهووی زەڕباهووی عەنبەر کڵافان
ماڵە بەگزادەو سیڕەی سەماوەر
رووی ئەو روبارەی وا ئەگرتە بەر
دەنگی نەکیسا و بەزمی خوسرەوی
لای مەحمودپاشا ئەکەوتە نەوی
ئاوازی باز و سەقر و باڵەبان
حیلەی ماینی جنسی کەحیلان
ئەمانە هەمووی خوا دابووی بە جاف
حوکمدارێك بوون بێ لاف و گەزاف
توخوا ئاوەکەی بۆن گوڵاوەکە
بۆ سەرچاوەکە کەمێ لاوەکە
بڕوانم ئاخۆ جامی فۆتۆگراف
نیشانم نادات شێوەی ئێلی جاف
نەء!! ئەو دەبدەبەو سەر ئەو سەر ئاوە
ئێستا ئەفسانەو نەخشی سەر ئاوە
ئەو دڕك و داڵە و ئەو قەل و داڵە
ماونەوە لە شوێن ئەو گەورە ماڵە
نازداران بوونە ماسی دوو ئاوان
بە بۆمبای راوکەر کەوتنە سەر ئاوان
لە تاوەی جەوری چەرخی چەپگەردا
ئەوان ئەسووتێن منیش لە هەردا
وێڵ و ئاوارەی ئێڵی مورادیم
نزیك لە مەرگم دووریش لە شادیم
لە تاوەی جەوری چەرخی چەپگەردا
ئەوان ئەسووتێن منیش لە هەردا
وێڵ و ئاوارەی ئێڵی مورادیم
نزیك لە مەرگم دووریش لە شادیم
بۆ بازی موراد هەر (قەیسەر قوومە)
بەختم شوومەو باز کەوتە وەیشوومە
من بۆ ئێڵ ئەگریم مات و دڵ خەستە
رستی خێوەتی بەگزادەش (رەستە)
لەشوێن سەر مەلا و (الله اکبر)
(کاری) کار ئەکا و (ستریت بە جۆکەر)
ئێستاکە رێی کۆچ گوشادەو ئاسان
کوا سەرئێڵ کۆچی لێخوڕی بۆ کوێستان
التعليقات مغلقة.