عەتا ئەحمەد – لە غوربەتا
لە غوربەتا
وتنی: عەتا ئەحمەد
سینەی پڕ ئاهم .. هەورێ تیا دەگری و
لە چاوانمەوە.. باران داناکا!
عومریشم .. بەفری بەر هەتاوێکە..
هەر ئەبێ بە شوێن مردنا ڕاکا
کێ بێ پایزی دڵی ئاوارەم..
بنێتە کۆشی قرمزیی بەهار؟
کەشتیییەکی وێڵ لە دەریای تووشا..
تۆ بڵێی ڕۆژێ بگاتە کەنار؟
بۆ شادمانیی زۆر کورتە تەمەن..
بۆ کوێرەوەریی.. نابڕێتەوە
چۆن گڕ ناگرێ بەفری بەرهەتاو؟..
خۆ دوای چەند ساتێ.. هەر ئەتوێتەوە
ئای چەندە مەیلم لە گریانێکە..
دڵ و جەرگمی تیا بتوێتەوە
تەنیام و تەنیا.. کەس نیە باوەش..
بۆ ئەم ئازارەی من بگرێتەوە
با خۆم گێل نەکەم.. منی غوربەتیی..
کەنارم تۆف و شەستەبارانە
کەس ناگری بەسەر ڕوخساری منا..
تەم و مژێکی دەم ئێوارانە
ئەم کۆپلەیەی خوارەوە لە ڤێرژنە کۆنەکەیا هەیە
خۆزگه ئه متوانی گڕ له خۆم به ردەم..
دوکەڵم ببێ به تارای سەر ڕووت
یان بمرم و سەگ له لاشەم تێر بێ..
دنیای ڕوان
ئەم کۆپلەیەی خوارەوە لە گۆرانی سینەی پڕ ئاهم دا هەیە کە بە دەنگی سۆزان نامۆ وتراوە
من بۆ چی نەمرم بۆ نەبمە هەورێك
تێر بگریم بەسەر باڵای بالای ئازیزا
تەنیام و تەنیام کەس نیە باوەش
بۆ ئەم ئازارەی من بگرێتەوە….
